Një automjet është përfshirë nga flakët këtë të mërkurë në Sarandë, duke pësuar djegie të pjesshme, fatmirësisht pa viktima apo lëndime në njerëz.
Incidenti ka ndodhur në ambientet e një servisi, ku pronari nga Delvina e kishte çuar automjetin tip “Mercedes-Benz”.
Arsye për djegien e automjetit dyshohet një defekt teknik, ndërsa policia po punon për përcaktimin e shkaqeve të rënies së zjarrit.
Njoftimi i policisë:
Sarandë/Informacion paraprak
Më datë 18.05.2022, rreth orës 15:10, në lagjen nr.3, Sarandë, tek servisi i shtetasit A. L., është djegur pjesërisht automjeti tip “Mercedes-Benz”, në pronësi të shtetasit P. K., 35 vjeç, banues në Delvinë.
Paraprakisht dyshohet se zjarri në mjet ka rënë për shkak të një defekti teknik.
Grupi hetimor ndodhet në vendngjarje dhe po punon për përcaktimin e shkaqeve të rënies së zjarrit.
